تابلۆی نەوەیەکی چاوەڕوانکراو

زانیاری دەربارەی بەرهەم

ئاوەکان تا گەرمی نەبینن نەبن بە هەڵم، ناگەن بە ڕوونی. تۆو هەتا نەتەقێت و نەڕزێت، ژیانی چرۆ و گوڵ نایەتە بەرهەم، ڕووبارەکان بەردەوام بەخوڕ دەڕژێن و هەمیشە دەکشێن بە تاشە بەردەکاندا، بەمەش دەپاڵێورێن و خاوێن دەبنەوە و، دەگەن بە ئاستی دڵۆپەکانی چاوی هەور. بەبێ بەفر و باران بەهار نایەت، ئەگەر بشیەت نرخی نازانرێت. ئاڵتوون لەو نرخ و بریسکەیەی کە بەدەستی دەهێنێت و، پۆڵاش لەو بەهێزی و خۆڕاگرییەدا کە خاوەنییەتی، قەرزاری ئەو مەنجەڵ و قازانانەن کە تیایاندا تواونەتەوە. خاکی ڕەق و تەق بەئەندازەی ئەوهەورەگرمانەی کە بەسەریدا دەبارێن، دەبوژێتەوە و هەڵدەئاوسێت و دەگات بە ئاستی دایکایەتی کردن بۆ هەزار و یەک گوڵ و ڕێحانە. تاریکی لە باوەشیدا ڕووناکی گۆش دەکات و لەکۆتایشدا بە زیانی خۆی دەشکێتەوە. زستان هەمیشە ئامێری جۆڵاییەکەی لەپێناو چنینی بەهاردا دەجوڵێنێت. لەبەر ئەمەیە کە هەموو زستانێک بەهار و، هەموو شەوێک ڕۆژێکی لەدوایە مردنەکان لا پێناو ژیانەوە و ئازارەکانیش لەبەرخاتری ژیانێکی ڕەنگاوڕەنگترن. تاک،بەدێژایی ژیانی هەزاران جار دەمرێت و دەژیەتەوە و، بەمەش لە پەستانە تاریک و خەڵەتێنەرەکانی (من) ڕزگاری دەبێت و دەگات بە نەمریی ڕۆح.