ڕاستی بەدیهێنان و تیۆری پەرەستن

زانیاری دەربارەی بەرهەم

بەڵێ، هەر لە جیهانی بوونەوەرە زەبەلاحەكانەوە بۆ جیهانی بوونەوەرە ئاساییەكان و لەوێشەوە بۆ جیهانی بوونەوەرە وردیلەكان شاهێدی بوونی دانایی و سوود و بەرژەوەندییەكی وەهاین كە تەواوی جیهانی داپۆشیوە. ئەو مرۆڤەی كە لەنێو تەواوی ئەم جیهانانەدا بەڕێزترین بوونەوەرە و خاوەنی لێهاتوویی بوونە بژاردەترین دروستكراوە، كاتێك لەم دونیایەدا تەنها لە ڕوانگەی دیوی ماددە و جەستەوە بە هەزاران دانایی و حیكمەت ڕازێنراوەتەوە، ناكرێت هێندە داماو و بێدەرەتان بێت تەنها بۆ ژیانێكی چوار پێنج ڕۆژیی دونیا هاتبێت و پاشان مەحكوم بە مەرگێك بكرێت كە زیندووبوونەوەی لەدوا نەبێت. ناكرێت بیر لەوە بكرێتەوە ئەو دونیایەی تەنانەت ناتوانێت لە ڕوانگە ماددییەكەشەوە دڵنیایی و ئاسوودەیی بە مرۆڤ ببەخشێت و وەڵامی داخوازییەكانی بداتەوە، بتوانێت وەڵامی ئەو توانایی و لێهاتووییانەی وەك خەیاڵ و ئارەزووی هەمیشەیی بوون بداتەوە كە تەواوی بوونیان داپۆشیوە. بەو پێیەی هەر لەسەرەتاوە پووچ نەبوون و بێبەها نەبوونی هەستەكانی مرۆڤمان قبووڵكردووە، بۆیە ئەو مرۆڤەی لەم ژیانەدا هەست و ئارەزووی ژیانی نەبڕاوە و هەمیشەیی بوونی بەدی نایەت، بەدڵنیاییەوە وەڵام و پاداشتی ئەم هەستانەی كە لەسەر بنەمای داناییەك پێی بەخشراوە، لە جیهانێكی دیكەدا وەردەگرێت.